反侵略治療反分裂

林央敏

反分裂
一句愛國的法號
為何透過MIC 喝出來
就會茲尼歹聲嗽

反分裂
一領掩護國土的衫
為何掛MIC 的牌子了後
就會包藏歹銃銃的心

原來,MIC 的反分裂
是賊仔製的侵略法
一綑催動野心的咒語
用來侵略台灣的發條

原來,MIC 侵略法
已經打扮做反分裂
咱著目睭擘互金,看諳
這部中國地圖飼肥法
十九世紀晉前
一筊MIC 的菜籃仔反分裂
加北爿的蒙古滿州收入肚
向南踏死吳越收除大理國
向西藉口幫助維吾爾平亂
煞將東土耳其斯坦挲來囥
二十世紀擱欺騙達賴喇嘛
將邊界徙到印度的頭殼頂
東爿拄著阻礙腳手的海湧
就為炸彈裝翅股
戰船變身做鯊魚
興趣趣欲加台灣吞落腹內
這就是賊仔侵略法

未來,MIC 反分裂法的增修法條
會罵外蒙古分裂國土
會罵交趾郡換名越南是分裂漢帝國
會罵露西亞分裂大元朝的欽察汗
會罵朝鮮分裂大唐的高句麗
會罵琉球被分裂做Okinawa
會罵日本分裂支那徐福的開拓
會罵黑龍江佮烏蘇里江連手分裂中國
擱欲進兵加外興安嶺押來北京團圓
擱欲教示新加坡昧使「數典忘祖」
然後看著歐羅巴是中國相黏的版圖
看著「彼美人兮!西方之人兮」
發現美洲人捌行入來詩經跳萬舞
證明美國是失落置西半球的地圖
所以最後欲擱MIC 一條反分裂法
「普天之下,地球之上,率皆中土」

這款大頭病若起痟
會暝日威脅自由的國度
所以G7+1,新八國著合作
煉製一帖「反侵略」
通好治療中國的「反分裂」
解放阿拉留在回疆的民族
解放佛祖留在藏土的民族
解放被中國定義過的番族
東夷西戎南蠻北狄攏來反侵略
上好將中國史寫轉去春秋戰國
互中國回復本來面目
為地球增加七八國
陪伴民主的台灣國

Share.